網上盛傳~~
|
|
|
親愛的老婆：
結婚十年， 除咗頭嗰幾個月之外， 咁多年來， 我完全無俾你感受過幸福， 反而傷害你嘅事就鑊鑊新鮮鑊鑊甘， 摧毀咗你一生， 對唔住， 對唔住， 對唔住， 對唔住， 重要嘅事要講三次， 所以我要講夠四次。感激你為咗仔女忍辱多年， 多謝， 多謝， 多謝， 多謝。 事情發生一年， 比起剛開始時， 你嘅憤怒， 憎恨， 絕望嘅感覺似乎緩和咗少少， 可能係好少好少。 你當然仍然好嬲， 不過你又會嘗試放低; 你仲係好憎我， 但你又會因為見到我唔開心而心痛; 你覺得人生無意義， 無希望， 但係又連放棄嘅選擇都無; 你感覺到我地關係好似比以前好， 但又一萬個唔願意接受， 竟然係要用一件咁嘅事去改善我地關係。所以， 有時你寧願維持以前嘅惡劣關係。 想放低但唔甘心， 有愛但又有恨， 偶而好似看到一絲曙光， 但好快又發覺自己仍然活係黑暗當中。矛盾又複雜嘅情感， 每日都係內心糾纏， 如你所講， 真係人都癲。所以你好叻， 因為你無癲到。 我， 雖然無可能感受到你錐心之痛， 但其實， 我都會難過， 內心都係充滿矛盾同掙扎。 件事剛剛發生之後， 你決意離婚。我果時好恐懼， 因為驚無咗個家。但又會覺得 "彼此也在捱" 嘅關係終於都完， 而有 "大家都得到解脫" 嘅感覺。離婚可能係一種解脫， 但小朋友以後喺單親家庭長大又點算? 害怕， 覺得解脫， 又再驚返。 少不了嘅， 一定係無窮無盡嘅自責。摧毀咗你一生， 破壞咗一個唔算得上幸福， 但至少係完整嘅家庭。自己都接受唔到自己嘅錯， 自責過咗籠之後， 掉返轉努力去推個波俾你， 同自己講 "你都有責任"， 諗你嘅唔好嘅野， 去等自己好過啲。逃避到盡頭後， 又會覺得， 我點解仲有顏面可以去怪你， 我何來資格? 自責， 替自己找藉口， 逃避現實， 然後換來更多自責。 雖然我做咗最不負責任嘅事， 但其實我可以不知廉恥地講， 我事後一路都想負返責任。 所以， 到你俾機會我， 我忽然覺得我終於有一個做人嘅目標， 就係希望以後可以償還返幸福快樂俾你。一下子， 我對你許下好多承諾。然後， 好快我就覺得 "幸福快樂" 好似係 Mission impossible， 見到你平時好似無咁情緒波動， 但原來你仍然係終日以淚洗臉。一開始我地有返少少以前拍拖嘅感覺， 但好快又打回原型， 似乎大家都仍然只會見到對方缺點。 有時看到希望， 但似乎每一次都係換來失望。 好快就認識到， 我似乎完全無能力改變你。所以有想過放棄， 但又答應過以後好好對你， 所以我又會後悔對你許下太多承諾， 同埋我覺得自己無放棄嘅權利， 只有贖罪嘅資格。然後你又話你唔想我留低係為咗贖罪。 放棄唔得， 贖罪都唔得，咁惟有自暴自棄。自己都睇唔起自己。 自從有咗明愛向晴軒嘅出現， 一切都唔同哂。 向晴軒嘅人有如沙漠裡的綠洲，讓我們找到棲息的地方; 好比大海航行的舵手， 助我們脫離險阻; 彷似迷霧裡的明燈， 引領我們走出迷茫。 Sorry， 爛gag 嚟嘅。 實情當然無咁順利， 但係如果唔係向晴軒， 我諗我地可能原地踏步緊， 或者進展會更慢。我知道你都好感激佢地， 所以我借呢個機會， 幫你， 都幫我自己， 同佢地講多謝， 多謝， 多謝。無錯， 因為重要， 所以講三次。 明明係一封俾你嘅信， 但又講咗其他野。你一定覺得， 我就係咁， 從來都估我唔到， 永遠都令你難以捉摸。我諗， 主要係因為我從來都唔同你解釋我嘅諗法。 以前， 覺得我對你好， 無需要講， 依家明白， 愛， 係要講出口。我愛你。 以前， 唔明白每日努力工作， 搏命搵錢， 點解你都唔滿足。但原來你唔係要錢， 而係要我俾安全感你面對前路。我以後會俾你。 以前， 工作以外嘅時間， 幾乎全部都放係屋企， 但原來你係唔識得神交， 無靈魂嘅軀殼從來都無認真地同你溝通過。我會學習點樣回魂。 無幾耐之前， 我以為我喺另外一個人身上， 搵返以前同你一齊嘅感覺， 但原來果啲感覺唔係叫愛。我只愛你一個。我只愛你一個。我只愛你一個。我只愛你一個。講咗四次。 依家， 我明白， 唔係靚仔都可以感情豐富， 咁樣並唔係罪過。只要搞清楚有 Feel 唔等於要去進一步行動。因為我發現， Feel 呢樣野， 你唔理佢， 佢好快就消失。我會提醒自己， 我無陳冠希咁靚仔。 依家， 我明白， 原來幾咁PK 都唔應該過份自責， 因為自怨自艾， 自暴自棄只會令自己失去改變嘅動力同希望。說易行難， 但我會試吓積極一點面對。 依家， 我明白， 原來我有選擇嘅權利， 原來只要我做到唔愛你， 我係完全可以放棄。因為， 我覺得對仔女來講， 我地 "和平分手" 比 "勉強一齊" 會係更好嘅決定。所以， 請你相信我， 我留低， 唔係因為內疚， 負責， 贖罪， 償還， 亦都唔係為咗小朋友， 而係因為我喜歡同你一齊。OK， 就算被迫， 都係我自己滿足被你所迫， 都係我自己選擇。 依家， 我明白， 我無需要見到你改變我先至可以感覺到希望。我要改變嘅唔係你嘅感受， 而係要改變 "你必須要改變" 呢個諗法。聽到你話自己唔開心， 當然我都會覺得好灰心氣餒， 但我要提醒自己， 你唔開心，我感覺灰心等等， 呢啲都係好自然嘅感覺， 我無需要強求去改變呢啲感受， 但我可以改變對呢啲感受嘅感受。唔好因為呢啲感受而再產生更加多負面情緒。 灰心氣餒之後可以重新振作， 無需要再進一步去到傷心絕望。 我知道， 唔係一封信就可以解開你嘅心結。 因為我唔係導演彭順， 所以我諗我好難去解開你心結。 無錯， 又係一個爛 gag。 因為我發覺， 我好鍾意見到你笑。 所以， 被迫又好， 自願又好， 請容許我選擇陪你共渡難關， 讓眼淚中可以偶然有一點歡笑。 你的老公 2016年5月 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ |
|
告別婚外情 (摘自2012年3月Marie Claire)
